Дзюдочиларимиз янги мавсум олдидан жам бўлишди

Кеча кечки машғулотлардан сўнг Ўзбекистон дзюдо федерациясида терма жамоамиз аъзолари билан учрашув ташкил этилди. Самимий мулоқот тарзида ўтган учрашувда 2025 йилги мавсум режалари муҳокама қилинди. Федерация раиси ўринбосари Зафар Қаҳрамонов, Бош котиб Азиз Собиров дзюдочиларимизга янги мавсум тақвимидан ўрин олган халқаро мусобақаларда ғалаба ва омад ёр бўлишини тилади. 

Режа бўйича терма жамоамиз Австриянинг Миттерзиль шаҳрида ўтказиладиган халқаро ўқув-машғулот йиғинида иштирок этади. Биринчи IJF мусобақаси 1-2 февраль кунлари Франция пойтахти Париж шаҳрида ташкил этилади. "Катта Дубулға" туркумига кирувчи ушбу мусобақада терма жамоамиз ҳам қатнашади. Шундан сўнг Baku Grand Slam (14-16 февраль), кейин эса Tashkent Grand Slam (28 февраль - 2 март) турнирлари бор.