Эдди Хирн: "Эннис - Ортис жанги шартлари келишиб олинди"

"DAZN раҳбарияти, мен, Оскар Де Ла Хойя, Эрик Гомес билан учрашув ўтказдик ва ушбу жанг шартлари бўйича келишиб олдик, - деди WBA вақтинчалик чемпиони Энниснинг манфаатларини ҳимоя қилувчи Хирн ESPN’га берган интервьюсида. - Эннис бу шартларга рози бўлди, шунинг учун агар Ортиснинг промоутерлари бандларни ўзгартирмоқчи бўлса, биз буни қайта муҳокама қилишимиз керак бўлади".

Ортис ва Эннис жанги бўйича келишув 8 ноябрь куни WBC вақтинчалик чемпиони Виржил Ортиснинг Эриксон Любинга қарши жанги олдидан амалга ошиб бўлганди. Жангнинг иккинчи раундида Ортис Любинни техник нокаутга учратган эди. 

"Лекин улар бу жангни унчалик хоҳлашмаяпти. Виржил - ажойиб жангчи, Эннис ҳам. Бу жангни ўтказмасликка сабаб топиш осон", - деди Хирн Ортиснинг промоутерлари ҳақида.  

"Менга уларнинг мен эшитган кўплаб баёнотлари ёқмайди, аммо аниқ биламанки, DAZN бу жангни ўтказиш учун ҳаммага катта босим ўтказади. Шунинг учун биз Далласга, Ортис ва Любиннинг жангига биз истаётган жангга 100 фоиз қизиқишимизни кўрсатиш учун келдик", - дея сўзларига якун ясади Хирн.