Элдор Шомуродов Париж Олимпиадасига борадими?

Хабарингиз бор, футбол бўйича Олимпиада баҳслари 24 июлдан 10 августга қадар Францияда бўлиб ўтади.

Ўзбекистон олимпия терма жамоаси "C" гуруҳида Испания, Миср ҳамда Доминикан Республикаси термаларига қарши ўйнайди.

Испания – Ўзбекистон

24 июль, Париж 

Ўзбекистон - Миср

27 июль, Нант

Доминикан Республикаси – Ўзбекистон

30 июль, Париж

Мусобақа регламентига кўра, ҳар бир терма жамоада 23 ёшгача бўлган 18 нафар футболчи бўлиши керак. Терма жамоалар ўз хоҳишига биноан 18 кишилик рўйхатга 3 нафаргача ёши катта футболчини қўшиб олишлари мумкин.

Championat.asia сайти маълумотларига кўра, айни пайтда Ўзбекистон олимпия терма жамоасининг расмий мадҳияси – Конста ижросидаги "Ўзбекистонлик" қўшиғига клип суратга олинмоқда. Жараёнда Тимур Карадзе шогирдлари ҳамда Ўзбекистон МТЖ сардори Элдор Шомуродов ҳам иштирок этмоқда. Демак, катта эҳтимол билан Элдор Шомуродов терма билан биргаликда Париж Олимпиадасига йўл олади.

Аввалроқ Шомуродов Олимпиада ҳақидаги саволга жавоб бераркан, у учун ватан шаънини ҳимоя қилиш шараф эканлигини таъкидлаган эди.