13 апр 14:14
Янгиликлар

Спорт курашлари

Элмурат Тасмурадовнинг принципиал рақиби, Олимпиада чемпиони коронавирусдан фориғ бўлди

Аввал хабар берганимиздек, юнон-рим кураши бўйича Рио-2016 Олимпиадаси чемпиони, икки карра жаҳон чемпиони Исмаэль Борерода коронавирус аниқланиб, касалхонага ётқизилганди.

Кубалик чемпион шу йилнинг март ойи бошида Канаданинг Оттава шаҳрида ўтказилган Панамерика чемпионатида иштирок этган ва якунда -67 кг вазн тоифасида мусобақа ғолибига айланганди.

Чемпионат якунланганидан сўнг Куба терма жамоаси Оттавада қолиб, бир ҳафтадан кейин Канаданинг айнан шу шаҳрида старт оладиган Панамерика квалификацион турнирига тайёргарлик кўрган. Бореро ўтган йили Нур-Султан шаҳридаги жаҳон чемпионатида Токио-2020 лицензиясини қўлга киритгани боис бу мусобақада иштирок этмаганди.

Кубалик курашчилар 17 март куни Канададан Озодлик оролига қайтишган ва шундан сўнг Исмаэлда инфекция симптомлари аниқланган эди. 28 март куни эса унинг коронавирусга топширган таҳлили ижобий натижа берганди.

"Габана" радиосининг хабар беришича, Борреро ва физиотерапевт Милена Родригес Гаванадаги Педро Коури Тропик тиббиёт институтида даволаниб, коронавирусдан фориғ бўлишган. Уларнинг ҳар иккиси ҳам изоляция даврини якунладилар. Тез орада Борреронинг машғулотларга қайтиши айтилмоқда.

Эслатиб ўтамиз, Исмаэль Бореро Рио-2016 Олимпиадасининг ярим финалида ҳамюртимиз Элмурат Тасмурадовни мағлубиятга учратиб, финалга йўл олган эди. Элмурат эса кейинчалик бронза медали учун кечган беллашувда ғалаба қозониб, совриндорлар сафидан жой олганди.