Элшод Расулов жаҳон чемпионатига тайёргарлик, таркиб ва Ҳиндистонга жўнаб кетиш ҳақида гапирди

Шу кунларда ЖЧда иштирок этадиган Ўзбекистон аёллар терма жамоаси бош мураббий Элшод Расулов бошчилигида Тошкентда ўқув-машғулот йиғинларини олиб бормоқда. Ўзбекистон бокс федерацияси матбуот хизмати мазкур йиғинга тайёргарлик юзасидан мураббийнинг фикрлари билан қизиқди. 

- Айни пайтда Тошкентда ўтказилаётган йиғин, шунингдек олдинда турган ЖЧга тайёргарлик ҳақида гапириб бера оласизми? 

- Ҳозирги кунда пойтахтимиз Тошкент шаҳрида жаҳон чемпионатига тайёргарликнинг сўнгги босқичларидан бирини олиб бормоқдамиз. Асосан техник-тактик ҳолатга эътибор қаратяпмиз. Рақибларимизни биламиз ва шундан келиб чиққан ҳолда тайёргарлик ўтказяпмиз. 

- Якуний таркибни ўзингиз учун аниқлаб олган бўлсангиз керак. Бу ҳақида қачон билиб олишимиз мумкин бўлади? 

- Ҳа, жаҳон чемпионатида қатнашадиган якуний таркибни аниқлаб олдик. Аёллар терма жамоаси мураббийлар штаби ўтказилган мусобақалар ва ўқув-йиғин машғулотларидан келиб чиққан ҳолда, Нью-Делида ўтказиладиган жаҳон чемпионатида қатнашадиган таркибни аниқлаб олдик. Бу бўйича яқин кунларда таркибни эълон қиламиз. 

- Терма жамоамиз қачон Нью-Делига жўнаб кетади? 

- 7 март куни жаҳон чемпионати ўтказиладиган Нью-Дели шаҳрига йўл оламиз. У ерда ЖЧга тайёргарликнинг энг охирги босқичи ўтказилади.

- Ҳиндистондаги ЖЧда терма жамоа олдига қўйилган минимум вазифа қандай?

- Бугунги кунга келиб қизларимиз яхши спорт формасида. Кўплаб халқаро мусобақаларда қатнашдик, тажриба орттирдик. Мен шогирдларимга ишонаман ва рингга албатта яхши натижа учун чиқамиз.