Энтони Жошуа шифохонадан чиқди

Жошуа енгил жароҳат олиб, кузатув учун шифохонага етказилганди. Кеча тушдан кейин шифокорлар уни уйда даволанишга рухсат беришди. Авария душанба куни Нигериянинг энг гавжум йўлларидан бирида содир бўлганди. Кеча кечқурун марҳумларнинг жасадлари Буюк Британияга жўнатилди. 

"Боксчининг жисмоний мураббийи Сайна Гами ва шахсий мураббий Кевин Айоделе ҳалок бўлди. Энтони ва унинг онаси бугун кечқурун ватанига қайтишга тайёрланаётган икки марҳум дўстига сўнгги ҳурмат бажо келтириш учун тушлик вақтида Лагосдаги дафн этиш уйига ташриф буюришди", деб хабар берди Лагос штати расмий вакили Гбенга Омотосо.

Жошуанинг жароҳат ташхислари ҳали ҳам номаълум, шунингдек, ушбу бахтсиз ҳодиса ва икки дўстини йўқотиш унинг кейинги йил баҳорида жанг ўтказиш режаларига қандай таъсир қилиши ҳам маълум эмас.

Нигерия полициясининг маълум қилишича, Жошуа ва унинг икки дўсти бўлган автомобиль ҳайдовчиси ҳам касалхонадан чиққан ва ҳодиса тафсилотлари бўйича кўрсатма бермоқда. Тўқнашув содир бўлган тўхтаб турган юк машинаси ҳайдовчиси воқеа жойини тарк этган ва ҳозирда полиция уни қидирмоқда.