Энтони Жошуага 10 кун муҳлат берилди

Тайсон Фьюри билан ишлайдиган британиялик промоутер Фрэнк Уоррен Жошуадан жавоб кутиш учун охирги муддатни белгилади. Ноябрь ойига режалаштирилган ушбу жанг бўйича музокаралар якуний босқичга етди.

"Агар Жошуа келаси ҳафта охиригача ўз розилигини бермаса, қўрқаманки, бу жанг ҳам ҳеч қачон ўтказилмаган бошқа кўплаб ажойиб жанглар қисматига дучор бўлади", — деди Уоррен Daily Mail нашрига берган интервьюсида.

Аввалроқ, Фьюри ҳар қандай ҳолатда ҳам 20 ноябрь куни Нью-Йоркдаги "Медисон Сквер Гарден" аренасида рингга чиқишни режалаштираётгани, агар Жошуа шартномани имзоламаса, унга бошқа рақиб топилиши маълум бўлганди.

Эслатиб ўтамиз, ҳар икки боксчи ўн йил давомида танаффуслар билан олиб борилган музокаралардан сўнг, жанг учун дастлабки розилигини берганди. Бироқ, кейинчалик улар ўртасида жанг ўтказиладиган жой бўйича келишмовчиликлар юзага келди: тадбирни молиялаштираётган саудиялик магнат Турки Ал аш-Шайх жангни дастлаб режалаштирилган Англиядан АҚШга кўчиришни талаб қилмоқда. Фьюри жамоаси бунга рози, бироқ Жошуа томони бир қатор қўшимча талабларни, жумладан, солиқ юкининг ошиши сабабли гонорарни кўпайтиришни талаб қилмоқда.