Эркин кураш афсонаси Абдулрашид Садулаев қайтмоқда

Бу ҳақда эркин кураш бўйича Россия терма жамоаси бош мураббийи Хаджимурат Гацалов хабар берди. 

Мутахассиснинг айтишича, жароҳатини даволаётган Садулаев келаси ойдаёқ мусобақаларда иштирок эта бошлайди. 

"Абдулрашид менга январь ойида ўтказиладиган Яригин турнирида қатнашишга тайёр эканини айтди. Шунингдек, у Европа чемпионатга ҳам бормоқчи. Лекин қитъа чемпионати таркиби айнан Яригин Гран-приси натижаларига қараб шакллантирилади. 97 килограмм вазн тоифасида Алихан Жабраилов ҳам бор. Садулаев яхшигина рақобатга дуч келиши аниқ", – деди Гацалов.

Эслатиб ўтамиз, Абдулрашид шу йилнинг сентябрь ойида Сербиянинг Белград шаҳрида ўтказилган жаҳон чемпионатида иштирок этганди. Ўшанда у ярим финалда Баҳрайн шарафини ҳимоя қилаётган Ахмед Тажудиновга қарши баҳс олиб борган ва бўйнидан жароҳат олган эди. Кейинроқ у жарроҳлик столига ҳам ётганди.