30 ноя 09:21
Янгиликлар

Спорт курашлари, Кураш

Эронлик курашчидан мураббийи россиялик рақибга ютқазиб беришни сўради

Польшанинг Бидгоше шаҳрида ўтказилган спорт курашлари бўйича 23 ёшгача бўлган полвонлар ўртасидаги жаҳон чемпионатида қизиқ ҳолат юз берди.

Эронлик курашчи Алиризо Карими-Махианининг мураббийи шогирдидан 1/8 финал босқичида россиялик спортчига атайин ютқазиб беришни талаб қилди. Бу баҳс -86 кг вазн тоифасида ўтказилаётганди. Беллашувда эса айнан Алиризо катта фарқ билан устунликка эришаётган эди.

Гап шундаки, агар эронлик курашчи баҳсда ғалаба қозонса, чорак финалда исроиллик Ури Калашников билан тўқнаш келарди. Эрон ва Исроил давлатлари ўртасидаги сиёсий вазият сабаб эронлик мураббий шундай қарорга келган. Натижада Карими устозининг айтганини қилиб, россиялик курашчига ютқазиб берди.