07 авг 18:40
Янгиликлар
Эртага иккита финал. 8 август Баҳодир Жалолов боксдаги аламларимизни бироз униттирадиган кун бўлиши шарт
8 август Токио Олимпиадасининг охирги куни. Бокс бўйича сўнгги чемпионлар аниқланади. Аввалига -63 кг вазнда АҚШ вакили Кейшон Девис сўнгги иккита Жаҳон чемпионати олтин медали соҳиби кубалик Энди Крус Гомесга қарши рингга чиқади.
Бу жуфтлик Екатеринбургдаги дунё биринчилиги финалида фантастик жанг кўрсатган ва якунда ҳакамлар Гомеснинг ғалабасини эълон қилишган. Кубалик бизнинг иқтидорли боксчимиз Иқболжон Холдаровни ҳам икки бор мағлуб этган: Бутунжаҳон Бокс Cериясида ҳамда Гамбургдаги Жаҳон чемпионати финалида.
Девис ва Гомес жангги Токио Олимпиадасининг энг шиддатли тўқнашуви бўлмаслигига ҳеч қандай сабаб йўқ. Бу жанг Тошкент вақти билан 10:15 да бошланади.
Шундан сўнг бизнинг ягона умидимиз - +91 кг вазндаги Баҳодир Жалолов АҚШ вакили Ричард Торресга қарши жанг қилади. Бу рақиблар ҳам бегона эмаслар. Екатеринбургда ҳамюртимиз Ричардни чуқур нокаут ҳолатига туширган эди. Бироқ Токиодаги Торрес умуман бошқа формада. Ярим финалда қозоғистонлик Камшибек Конкабаевни қандай аҳволга тушириб қўйганини гувоҳи бўлдик. Бу баҳс ҳақиқий титанлар тўқнашуви бўлишига шубҳа йўқ. Бу жанг Тошкент вақти билан 11:15 да бошланади.
Эртанги кун - бутун Ўзбекистон кутаётган кундир. Эртага биз учун, бокс мухлислари учун терма жамоамизнинг Токио-2020 даги ягона олтин медалини қўлга киритиб, аламларни бироз унитадиган кундир... Бошқасига Жалоловнинг ўзи рози бўлмайди.
Фикрлар