Эртага Тошкентда шахмат бўйича Prezident Kubogi турнири бошланади

Ўн кун давомида дунёнинг кўзга кўринган гроссмейстерлари мукофот жамғармаси 75 000 АҚШ долларини ташкил этувчи Prezident Kubogi мусобақаси бош соврини учун ўзаро баҳс олиб боришади. Иштирокчилар FIDE рейтингидаги ўринларига қараб А ва В гуруҳларида дона суришади.  

Регламентга кўра, А гуруҳида рейтинги 2250 ва ундан юқори шахматчилар қатнашади. B гуруҳидан эса рейтинги 2249 ва ундан паст шахматчилар жой олган. Классик шахмат бўйича ўтадиган ушбу мусобақада партия 90 дақиқа ва ҳар бир юриш учун 30 сония вақт қўшиб берилади. 

Юртимиз шарафини Нодирбек Абдусатторов, Жавоҳир Синдаров, Шамсиддин Воҳидов, Нодирбек Якуббоев сингари таниқли гроссмейстерларимиз ҳамда истеъдодли ёш шахматчиларимиз ҳимоя қилади. Абдусатторов халқаро турнирнинг биринчи рақамли иштирокчиси сифатида сараланган. Эронлик Парҳам Мақсудлу иккинчи, унинг ҳамюрти Амин Табатабайи учинчи рақам остида таснифланган.   

А гуруҳида қатнашадиган Top-10 шахматчилар ва уларнинг FIDE рейтинглари:

1. GM Нодирбек Абдусатторов (Ўзбекистон) – 2777  

2. GM Парҳам Мақудлу (Эрон) – 2712  

3. GM Амин Табатабайи (Эрон) – 2686  

4. GM Жавоҳир Синдаров (Ўзбекистон) – 2682  

5. GM Шамсиддин Воҳидов (Ўзбекистон) – 2681  

6. GM Ниҳал Сарин (Ҳиндистон) – 2676  

7. GM Нодирбек Яқуббоев (Ўзбекистон) – 2668  

8. GM Пураник Абҳиманю (Ҳиндистон) – 2652  

9. GM Мурали Картикеян (Ҳиндистон) – 2625  

10. GM Муниретинам Пранеш (Ҳиндистон) – 2580