Эртага “Универсиада” спорт ўйинларига старт берилади

Эътиборлиси, жорий йилдан бошлаб 2000 йилдан буён мунтазам ташкиллаштириб келинаётган мазкур спорт мусобақалари янгича форматда бўлиб ўтади. Эндиликда мусобақанинг финал баҳсларига битта ҳудуд мезбонлик қилмайди ва у ҳар йили мунтазам равишда ташкил этилади. 

Эртага старт оладиган мусобақанинг финал баҳслари жорий йилнинг 4 июнь кунига қадар давом эттирилади ва мусобақалар мамлакатимизнинг турли ҳудудларида ташкиллаштирилади. Бу йилги “Универсиада” спорт ўйинларининг финал босқичида 1 ярим мингдан зиёд талабалар спортнинг 12 тури бўйича ғолиблик учун кураш олиб борадилар.

Дастлабки мусобақа 23–26 январь кунлари Навоий шаҳрида спортнинг шахмат туридан бўлиб ўтади. “Ақл гимнастикаси”да тенгдошлари орасида тенгсиз эканликларини исботлаш учун 100 нафарга яқин талаба-ёшлар кураш олиб борадилар.