Esports World Cup Chess. Нодирбек Абдусатторов қайтди, у плей-офф босқичида!

D гуруҳидан жой олган ва NAVI жамоаси шарафини ҳимоя қилаётган Нодирбек Абдусатторов ўзи сингари илк учрашувида енгилган америкалик Фабиано Каруанага қарши баҳс олиб борди. Биринчи баҳсда Нодирбек қора доналарда ўйнашига қарамай ғалаба қозонди. 

Иккинчи учрашувда дунёнинг учинчи рақамли шахматчиси бўлиб турган Фабиано камбэк амалга ошириб, мувозанатни тиклади. Ҳал қилувчи армагеддон партиясида ёш гроссмейстеримиз номдор рақибини мағлубиятга учратишга муваффақ бўлди. Нодирбек ғолиблик учун асосий даъвогарлардан бирини мусобақадан чиқариб юборди.  

Бу жуфтлик ғолибини польшалик Ян-Криштофф Дуда кутиб турганди. Айнан шу баҳс плей-офф босқичининг сўнгги иштирокчисини аниқлаб берарди. Иккала партияда дуранг натижа қайд этилди. Армагеддон партиясининг бешинчи юришида шахматда камдан-кам учрайдиган ҳолат кузатилди. Дуда компьютер сичқончасида сипоҳни иккита олдинга сураман деб битта қаторга юриб қўйди. Натижада дебютдаёқ рақибига битта от устунлигини тақдим этиб қўйган Дуда курашни давом эттирмай, аламли мағлубиятини тан олди.  

Шу тариқа, Нодирбек Абдусатторов Esports World Cup Chess турнирининг гуруҳ босқичини муваффақиятли якунлаб, иккинчи ўрин билан плей-оффга, яъни 1/8 финалга йўл олди. Ушбу гуруҳдан Магнус Карлсен биринчи ўрин билан плей-оффга чиқди. 

Афсуски, мусобақанинг асосий тўрига саралаш баҳслари орқали етиб келган Жавоҳир Синдаров хитойлик гроссмейстер Вей Йига ҳар икки партияда ҳам имкониятни бой бериб, Esports World Cup Chess турниридаги иштирокини якунлади.