Estoril Open турнирида финалчилар аниқланди

Мусобақада финал иштирокчилари маълум бўлди. Дунёнинг бешинчи ракеткаси Каспер Рууд 126 дақиқа давом этган 1/2 финал учрашувида ATP рейтингида 80-поғонада бораётган франциялик Кантен Галини қийинчилик билан мағлубиятга учратди - 6/4, 3/6, 7/6(2).

Бу билан норвегиялик теннисчи ўзаро учрашувлар ҳисобида олдинга чиқиб олди - 2:1. Гали томонидан амалга оширилган 16 та эйс зарбаси Руудни анча қийнаб қўйди. Каспер 3 тагина эйс зарбани ижро этган. Рууд эртага эълон қилинадиган ҳафталик янги рейтингда Даниил Медведевни ортда қолдириб, 4-ўринга кўтарилиб олади. 

Бугун норвегиялик теннисчи Millennium Estoril Open турнири бош соврини учун кечалиган финал учрашувида сербиялик Миомир Кечмановичга қарши кортга чиқади. Каспер Рууд ушбу турнирнинг биринчи ракеткаси сифатида ҳаракат қиляпти.