Эътироф-2016. Ҳасанбой Дўсматов энг яхши спортчи, Фотимахон Амилова энг яхши аёл спортчи

Боксчимиз Ҳасанбой Дўсматов энг яхши спортчи деб тан олинди. У ўтган йил Рио олимпиадасида Ўзбекистон терма жамоаси ҳисобига илк олтин медални келтирган ва якунда олимпиаданинг энг яхши боксчиси деб топилган эди.

Сузувчимиз Фотимахон Амилова 2016 йилнинг энг яхши аёл спортчиси деб тан олинди. Фотимахон паралимпиада баҳсларида бир йўла олтин, кумуш ва бронза медалларига эга чиққанди.

Ҳусниддин Норбеков йилнинг энг яхши паралимиячиси деб топилди. Енгил атлетиканинг диск улоқтириш баҳсларида иштирок этган Норбеков жаҳон рекорди эвазига олтин медални қўлга киритганди. У дискни 59 метру 75 сантиметр масофага улоқтириб, жаҳон рекордини янгилаганди.

Оғир атлетика бўйича Ўзбекистон терма жамоаси устози Баҳром Абдумаликов йилнинг энг яхши мураббий деб топилди ва "Эътироф-2016" совринига эга бўлди.