Фабио Уордли учун мажбурий даъвогар эълон қилинди

"Мозес Итаума камар учун мажбурий даъвогарга айланади", дея маълум қилди WBO ташкилоти раҳбари Густаво Оливери.

Британиялик 30 ёшли Фабио Уордли WBO йўналиши бўйича тўлақонли жаҳон чемпионига айланди. Унинг 20 ёшли ватандоши Мозес Итаума эса 24 январь куни америкалик Жермен Франклинга қарши жанг ўтказади.

"Итаума Жермен Франклин устидан ғалаба қозонса, Уордли учун мажбурий даъвогарга айланади. Бу ғалаба унга кучли позиция беради", - деди Оливери The Ring нашрига берган интервьюсида.

Итаума WBA ва WBO рейтингларида биринчи ўринни эгаллаб турибди. Франклин устидан ғалаба қозонган тақдирда, уни Кубрат Пулев ва Мурат Гассиев ўртасидаги жанг ғолибига қарши WBA мунтазам чемпионлик камари учун жанг кутмоқда.

Бундан ташқари, Итаума ва Уордли бир мураббий Бен Дэйвисон билан ишлайди ва промоутер Фрэнк Уоррен билан ҳамкорлик қилади. Бу эса яқин келажакда улар ўртасида жанг ўтказилишини таъминлайди.