Фанат Қаҳрамонов: Иккинчи имкониятдан ҳам фойдалана олмасам боксдан кетаман!

-75 кг вазнда Жаҳон чемпионати иштирокчиси Фанат Қаҳрамонов турнирдаги дастлабки жангини Андижон вилояти шарафини ҳимоя қилаётган Ҳавасбек Асадуллаевга қарши ўтказди ва ғалаба қозонди. Биз жангдан сўнг боксчимизга сиз учун ҳам қизиқ бўлган бир нечта саволлар билан мурожаат қилдик.

- Иорданиядаги лицензион турнирда муваффақиятсизликка учрадингиз. Танқидлар руҳий ҳолатинггизга салбий таъсир қилган, албатта. Орадан шунча вақт ўтди. Ҳозир рингга чиққанингизда нималарни ҳис қилдингиз?

- Лицензион турнир бошланишига уч кун қолганида мени аэропортдан қайтаришганди. Қисқа муддат ичида кўп вазн ташладим. Шунга қарамай, 4 та жанг ўтказдим. Афсуски, якунда Олимпиадага йўлланмани қўлга кирита олмадим. Мураббийларим менга иккинчи бор имконият беришмоқчи. Худо хоҳласа, бу сафар барчанинг ишончини оқлайман. Агар иккинчи имкониятдан ҳам фойдалана олмасам, у ҳолда боксдан кетаман.

- Рақибингизнинг даражасини кўрдингиз. Ҳар ҳолда Жаҳон чемпионати иштирокчисисиз. Ўзбекистон чемпионатида муносиб тарзда қатнаша олмасангиз, яна "танқидлар ёмғири" остида қолишдан қўрқмайсизми?

- Қўрқаман, жуда ҳам қўрқаман. Ҳозирги рақибим кеча ҳам рингга кўтарилган. Бу боксчини илк марта кўрдим. Очиғи, хайрон қолдим. Анчадан буён жанг қилмаганлигим туфайли биринчи баҳсда қийналдим. Кузатиб борсангиз кейингиларида чиройли жанг кўрсатаман.

- Чемпионлик йўлида кимларни ўзингизга асосий рақиб деб ҳисоблайсиз?

- Барча рақиблар кучли. Уларнинг орасида фаворитлар дея Одилжон Аслонов, ёшлар ўртасида Жаҳон чемпиони Акмал Қосимовни айтган бўлардим.

Сарвиноз Рахмонқулова суҳбатлашди