Фазлиддин Ғоибназаров: “Кроуфорд билан бирга машғулот ўтказяпмиз”

Аввал хабар берганимиздек, ҳамюртимиз 20 май куни АҚШнинг Нью-Йорк шаҳридаги дунёга машҳур “Мэдисон Сквер Гарден” аренасида америкалик боксчи Агустин Маурасга қарши рингга кўтарилади.

“Машғулотларни кучайтирилган режимда давом эттиряпмиз. Америкалик икки йўналишда жаҳон чемпиони бўлиб турган америкалик машҳур боксчи Теренс Кроуфорд билан битта залда спаринг асосида шуғулланяпмиз. Насиб қилса, ҳамюртларимизни чиройли ғалабам билан хушнуд этаман”, - деди Ғоибназаров.

Маълумот учун, Нью-Йоркдаги бокс оқшомининг марказий жанги айнан америкалик икки йўналиш чемпиони Теренс Кроуфорд иштирокида бўлиб ўтади.

Агустин Маурас 1990 йилда туғилган. Шу кунгача профессионал боксда 11 та жанг ўтказган. Ушбу жанглардан 6 тасида ғалаба қозонган, 2 бор ютқазган. Уч маротаба эса унинг жангида ғолиб аниқланмаган.

Эслатиб ўтамиз, Фазлиддин Ғоибназаров АҚШнинг Калифорния штати Карсон шаҳридаги StubHub Center аренасида бўлиб ўтган илк жангида америкалик Виктор Васкесни иккинчи раунддаёқ техник нокаутга учратган эди.