Фомин Тбилиси "Челленжер"ининг 1/8 финалида 4-ракеткага қарши кортга чиқди

Мукофот жамғармаси 60 000 долларни ташкил қилувчи мусобақанинг саралаш баҳсларидан иштирокини бошлаган Сергей Фомин икки ғалаба эвазига асосий тўрга йўлланмани қўлга киритганди. Ҳамюртимиз кеча асосий тўрнинг илк даврасида рейтингда ўзидан юқорида бораётган грузиялик Александр Бакшини 6/3, 6/7(5), 6/1 ҳисобида мағлубиятга учратганди.

Бироз аввал мамлакатимизнинг иккинчи ракеткаси 1/8 финалда яна бир мезбон теннисчи, турнирнинг тўртинчи ракеткаси Саба Пурцеладзега қарши баҳс олиб борди. Тўқсон тўрт дақиқа давом этган учрашувда тажрибали Пурцеладзе мухлисларнинг олқиши остида қийин ғалабани қўлга киритди - 6/3, 7/6(4). 

Ўйиннинг бошидан то охиригача эсиб турган кучли шамол теннисчиларнинг ҳаракатига ўз таъсирини ўтказмай қолмади. Баъзи вазиятларда минорадаги ҳакам мезбон теннисчи фойдасига қарорлар ҳам чиқарди. Фомин 6, Пурцеладзе 15 та эйс зарбасини амалга оширди. Сергей 1, Саба 6 та қўшхатога йўл қўйди. 

Таққослаш учун, Сергей Фомин ATP рейтингида 462, Саба Пурцеладзе 286-поғонадан жой олган. Бу теннисчиларнинг ўзаро ўтказган учинчи учрашуви бўлди. Барча қарама-қаршиликларда грузин теннисчисининг қўли баланд келган.