Франция G7 саммитини UFC турнирига тўғри келиб қолмаслиги учун кўчирди

Дастлаб G7 мамлакатлари етакчиларининг учрашуви 14-16 июнь кунлари бўлиб ўтиши режалаштирилган эди. Аммо кейин маълум бўлишича, 14 июнь куни Вашингтонда катта UFC турнири бўлиб ўтади - бу сана АҚШ байроғи кунига, шунингдек, мамлакат президенти Дональд Трампнинг 80 ёшга тўлишига тўғри келади.

"Президент Трамп эркин дунё етакчиси, шунинг учун ҳамкорларимиз уни G7 саммитининг ўта муҳим иштирокчиси деб билишади. Улар АҚШ президентининг жадвалига мослашиш учун илтифот билан саналарни ўзгартиришди", - дея саммитнинг қолдирилишига изоҳ берди Оқ уй вакили.

Оқ уйдаги UFC турнири доирасида олти ёки еттита чемпионлик жанги бўлиб ўтиши кутилмоқда.

"Бизда катта экранлар, саҳна бўлади, кун бўйи мусиқа янграйди. Умуман олганда, биз бир ҳафта давомида бутун Вашингтонни забт этамиз, мухлислар учун кўплаб турли тадбирлар ўтказамиз. Ва, албатта, бу ноёб воқеа бўлади. Жангчилар Оқ уйдаги Президент кабинетидан тўғридан-тўғри октагонга чиқишади", - дея эълон қилди UFC раҳбари Дана Уайт.