Freestyle Chess Grand Slam. Абдусатторов - Карлсен, Синдаров - Накамура 1/4 финал жавоб партиялари ўтказилди

Нодирбек Абдусатторов чорак финалнинг илк учрашувида шахмат афсонаси норвегиялик Магнус Карлсенга имкониятни бой бериб қўйганди. Афсуски, иккинчи баҳсда ҳам Магнус Нодирбек мағлубиятга учратиб, ортиқча қийинчиликсиз 1/2 финалга йўл олди. 

Саралаш баҳсларини жуда юқори даражада ўтказган Жавоҳир Синдаров эса америкалик Ҳикару Накамурага қарши кечган иккинчи партияда ҳам муросага келди. Бу сафар ҳам у қийин вазиятдан чиқиб кета олди. Кечаги илк партияда Жавоҳир муқаррар мағлубиятдан чиқиб кетганди.

Бироздан сўнг Жавоҳир Синдаров ва Ҳикару Накамура ўртасидаги ҳал қилувчи тай-брек учрашуви ўтказилади. Саралаш босқичдаги ўйинни ҳам қўшиб ҳисобласак, Жавоҳир ва Ҳикару ўзаро уч маротаба ўйин ўтказишди ва уччала партияда ҳам кучлар тенг келди. Нодирбек Абдусатторов эса чорак финалда мағлуб бўлган шахматчилар билан 5-ўрин учун курашни давом эттиради.