Freestyle Chess Grand Slam. Абдусатторов ва Синдаров иширокидаги ҳар икки баҳс бир хил натижа билан якунланди

Бугун мусобақада финал учрашувлари старт олди. Турнир бош соврини учун америкалик Фабиано Каруана мусобақа кашфиётига айланган германиялик Винсент Кеймерга қарши баҳс олиб боряпти. Кеймер 1/2 финалда норвегиялик афсона Магнус Карлсенни шов-шувли тарзда 1,5:0,5 ҳисобида мағлубиятга учратди. Дунё рейтингида иккинчи ўринда бораётган Каруана эса 7 та партия давом этган муросасиз курашда ҳамюртимиз Жавоҳир Синдаровдан 4:3 ҳисобида устун келганди. 

Учинчи ўрин учун кечаётган қарама-қаршиликда Синдаров Магнус Карлсен билан ҳисоб-китоб қилмоқда. Саралаш босқичидаги ўзаро учрашувда Жавоҳир номдор рақибини мағлубиятга учрата олганди. Бироз аввал якунига етган 3-ўрин учун баҳснинг илк партиясида Синдаров оқ доналарда ўйнашига қарамай, тажрибали Магнусга имкониятни бой берди. 

Афсуски, 5-ўрин учун кечаётган баҳсда Нодирбек Абдусатторов ҳам америкалик Ҳикару Накамурага ютқазиб қўйди. Рейтингнинг учинчи поғонасида бораётган Ҳикару қора доналарда ҳаракат қилганига қарамай, муҳим ғалабани қўлга киритди. Эртага шахматчилар ўртасидаги иккинчи учрашувлар ўтказилади ва унда гроссмейстерларимиз қора доналарда вазиятни ўнглаш учун уриниб кўришади. Камида дуранг натижа рақибларимизнинг умумий ғалабасига кифоя қилади. 

Маълумот учун, чемпион 200 000, финалчи 140 000 долларни қўлга киритади. Синдаров 100 000, Абдусатторов эса 50 000 АҚШ доллари учун курашяпти.