Freestyle Chess Grand Slam. Амалдаги жаҳон чемпионида мағлубият, 1/4 финалда кутилмаган натижалар

Хабар берганимиздек, Нодирбек Абдусатторов чорак финалнинг илк учрашувида шахмат афсонаси норвегиялик Магнус Карлсенга имкониятни бой бериб қўйганди. Саралаш баҳсларини жуда юқори даражада ўтказган Жавоҳир Синдаров эса америкалик Ҳикару Накамурага қарши кечган муросасиз партияда муқаррар мағлубиятдан чиқиб кетиб, дурангга имзо чекди. 

Амалдаги жаҳон чемпиони ҳиндистонлик Доммараджу Гукеш оқ доналарда америкалик Фабиано Каруанага ютқазиб қўйди. Саралаш баҳсларини қўшимча кўрсаткичларга кўра биринчи ўринда якунлаган Алиреза Фирузджа ҳам кутилмаганда оқ доналарда ўйнаганига қарамай, германиялик Винсент Кеймердан енгилди. 

Тўққизинчи ўрин соҳибини аниқлаб бераётган учрашувда плей-оффга чиқа олмаган икки гроссмейстер - асли арманистонлик, ҳозирда АҚШ шарафини ҳимоя қилаётган Левон Аронян ҳамда словениялик Владимир Федосеев ўзаро ҳисоб-китоб қиляпти. Уларнинг илк партиясида Аронян оқ доналарда ғалаба қозонди.

Бугун барча жуфтликлар ўртасида иккинчи партия ўйналади. Биринчи учрашувда ғалаба қозонган гроссмейстерларни бугун дуранг натижа ҳам 1/2 финалга олиб чиқади. Абдусатторовни фақат ғалаба, Синдаровни эса камида дуранг тай-брекка ўтказиши мумкин.