Freestyle Chess Grand Slam. Дербида Жавоҳир устун келди, Нодирбек ҳам 1/4 финалга чиқди

Дунёнинг кўзга кўринган гроссмейстерлари қатнашаётган мусобақада икки шахматчимиз - Нодирбек Абдусатторов ва Жавоҳир Синдаров ҳам ўз маҳоратини намойиш қиляпти. 17 февралга қадар давом этадиган турнир айлана тизимда ўтказилиб, унда бир шахматчи қолган ҳамма иштирокчилар билан рапид форматида ўзаро баҳс олиб боради. 

Иккинчи кун доирасида 4 та тур учрашуви ўтказилди. Нодирбек Абдусатторов 6-турда норвегиялик Магнус Карлсенга қарши дона суриб, мағлубият аламини тотиб кўрди. Жавоҳир Синдаров биринчи кун Карлсенни таслим этганди. Кеча Жавоҳир Нодирбекка қарши ўзига хос ўзбек дербисида ҳам ғалаба қозонди. 

Абдусатторов иккинчи кунги баҳсларни ҳам бироз омадсиз ўтказди. Нодирбекнинг айни пайтда ўзининг яхши спорт формасида эмаслиги кўриниб қоляпти. Шунга қарамай, у 1/4 финал йўлланмасини қўлга кирита олди. Бунга Левон Аронян ва Владимир Федосеевнинг саралаш баҳсларини суст ўтказгани ҳам ёрдам бериб юборди.   

Жавоҳир Синдаров 9 имкониятдан 6,5 очко жамғариб, 1/4 финалга 2-ўрин билан йўл олди. Франциялик Алиреза Фирузджа ҳам 6,5 очко тўплади ва қўшимча кўрсаткичларга кўра пешқадам сифатида чорак финалга чиқди. Фабиано Каруана, Магнус Карлсен, Винсент Кеймер, Нодирбек Абдусатторов ҳамда амалдаги жаҳон чемпиони Гукеш Доммараджу ҳам плей-оффда чемпионлик учун курашни давом эттиради.