Гаэль Монфис ATP-Тур антирекордини такрорлади

Франциялик теннисчи Майами "Мастерс" турнирининг илк даврасидан ўрин олган Уго Умберга қарши кечган учрашувни жароҳати сабаб якунига етказа олмади. Французлар ўртасидаги баҳс биринчи сетнинг олтинчи геймидан сўнг тўхтатилди. Бу пайтга келиб ҳисоб 3/3 кўринишида бўлиб турганди.

36 ёшли Монфис ўтган йилнинг августидан буён оёғидаги жароҳати сабаб турнирларда иштирок эта олмаётганди. У Майамига қадар Индиан-Уэллс "Мастерс" ҳамда Финикс "Челленжер" турнирларининг илк даврасидаёқ иштирокини тўхтатган эди.

Шу тариқа, Монфис Томми Хаас ва Янко Типсаревичга тегишли антирекордни такрорлади. Бу уч теннисчи фаолиятлари давомида 24 та учрашувни турли сабаблар билан якунига етказа олмаган. Маркос Багдатис ва Поль-Анри Матьёда 23, Николай Давиденко эса бу кўрсаткич 22 та учрашувни ташкил қилади.