Гандболдаги ўзгариш: Ўзбекистон ҳали жаҳон чемпионатига чиқмади

Ушбу ғалаба орқали гандболчиларимиз жаҳон чемпионатига йўл олгани ҳақида хабар қилгандик. Аммо, кутилмаганда Халқаро гандбол федерацияси Осиё терма жамоалари учун белгиланган квоталар ўзгаргани ҳақида хабар берди. Эндиликда Осиё чемпионати орқали бешта терма жамоа жаҳон чемпионатига йўл олади.

Қизларимиз жаҳон чемпионатига йўл олиш учун эртага Тошкент вақти билан соат 17:00да Гонконгга қарши кечадиган баҳсда ғалаба қозонишлари лозим бўлади. 

Маълумот учун, Осиё чемпионатида олтита терма жамоа ЖЧ йўлланмасини қўлга киритиши лозим эди. 12 та терма жамоа 2 гуруҳга бўлинган ҳолда кураш олиб боришлари белгилаб қўйилганди. Сўнгги лаҳзада Қатар терма жамоаси чемпионатда иштирок этмаслигини маълум қилди ва гуруҳимизда бешта терма жамоа қолди. Шу сабабли ҳам Халқаро гандбол федерацияси 11 та терма жамоа иштирок этадиган мусобақага 6 та квота ажратмасликка қарор қилди. Энди мусобақа якунига кўра 5 та терма жамоа жаҳон чемпионатига боради. 

Олтинчи квота? ХГФ ушбу квотани Хитой терма жамоасига тақдим этди. Кўринишидан, бундай учун бош гандбол ташкилоти учун маркетинг томонлама фойдалироқ ҳисобланади.