Қатар Осиё чемпиони бўлган қитъа биринчилигида Ўзбекистон терма жамоаси нечанчи ўринни эгаллади? (+ФОТО)

Ушбу қитъа биринчилигида Ўзбекистон ёшлар терма жамоаси ҳам иштирок этди. Қўл тўпи усталаримиз А гуруҳида 3-ўринни эгаллаб, 1/4 финалга йўл олишганди. Тўртта ўйиннинг иккитасида ғалаба қозониб, қолган иккисида мағлуб бўлган ёшларимиз А гуруҳида 3-ўрин билан плей-оффга чиқишган эди.

Афсуски, ёшларимиз жаҳон чемпионати йўлланмаси учун кечган чорак финал баҳсида Эрон терма жамоасига 24:36 ҳисобида имкониятни бой бериб қўйишди. Эрон, Баҳрайн, Корея Республикаси ва Қатар терма жамоалари келаси йили ўтказиладиган Жаҳон чемпионати йўлланмасини қўлга киритишди. 

Ўзбекистон ёшлар терма жамоаси 5-8 ўринлар учун ўтказилган учрашувда Саудия Арабистони ёшларига 27:38 ҳисобида ютқазишди. Кейин эса 7-8 ўринлар учун кечган баҳсда Иордания гандболчиларидан 25:29 ҳисобида енгилиб, Осиё чемпионатини 8-ўринда якунлашди. 

Ҳал қилувчи финал учрашувида Қатар терма жамоаси Баҳрайндан 28:24 ҳисобида устун келиб Осиё чемпионига айланди. Бронза медали учун кечган муросасиз баҳсда эса Корея Республикаси гандболчилари битта тўп фарқи билан Эрон терма жамоасидан устун келишди - 29:28.