Гейниш ва Чигирёв Жаҳон чемпионати олдидан ISU мукофотига даъвогар сифатида эълон қилинди, яна бир номинацияда Ўзбекистонга оид номлар бор!

Аҳамиятлиси, халқаро конькичилар иттифоқи тақдим этган номинацияларда Ўзбекистон терма жамоаси аъзолари ҳамда собиқ вакилларимиз ҳам бор.

Жумладан, жуфтлик йўналишидаги спортчиларимиз — Екатерина Гейниш ва Дмитрий Чигирёв "мавсумнинг энг яхши дебютантлари" номинациясида ғолиблик учун даъвогарлар қаторидан ўрин олди. Улардан ташқари, бу ном учун АҚШ вакиласи Сара Эверхардт ҳамда италиялик Анна Пецетта курашади.

Жорий аср бошида терма жамоамиз шарафини ҳимоя қилган Татьяна Малинина ва Роман Скорняков эса "Энг яхши мураббий" йўналишида ғолиблик учун кураш олиб боради. Собиқ вакилларимиздан ташқари Миэ Хамада ҳамда Майкл Хут мавсумнинг энг яхши мураббийи сифатида эълон қилиниши мумкин.

Ғолиблар 30 март куни эълон қилинади.

Аввал хабар берганимиздек, Гейниш ва Чигирёв жуфтлиги 25-30 март кунлари Америка Қўшма Штатлари Массачусетс штатининг Бостон шаҳрида жойлашган TD Garden мажмуасида ташкил этиладиган катталар ўртасидаги Жаҳон чемпионатида қатнашади. Ҳамюртларимизнинг чиқиши 26-27 март кунларига тўғри келади.