16 сен 11:26
Янгиликлар

Бокс/ММА

GGG фаолиятидаги илк мағлубиятни қабул қилиб олди

Эндиликда собиқ жаҳон чемпиони қозоғистонлик Геннадий GGG Головкиннинг мексикалик Сауль “Канело” Альваресга ютқазиб қўйгани ҳақида хабар берган эдик.

Лас-Вегасдаги T-Mobile аренасида ўтган такрорий жангда Головкиннинг барча учта чемпионлик камари, шунингдек, вакант бўлиб қолган The Ring журнали таъсис этган махсус чемпионлик титули ҳам ўртага қўйилганди.

Ўн икки раундга мўлжалланган жанг якунида ҳакамлар 115-113, 115-113, 114-114 ҳисобида Альвареснинг ғалабасини таъминлашди. “Канело” барча чемпионлик камарларини тортиб олиш баробарида Головкинга фаолиятидаги илк мағлубиятни ҳам тақдим этди.

Геннадий Головкин ҳисобида 39та ғалаба, биттадан дуранг ва мағлубият бор. Мексикалик боксчи эса бугун роппа-роса 50-ғалабасини қўлга киритди. Сауль бир маротаба мағлубиятга учраган ва яна битта жангда, яъни ўтган йили айнан Головкинга қарши баҳсда дуранг натижа қайд этган эди.