Ғиждувонда белбоғли кураш бўйича мусобақа ўтказилди

2008-2012 йилларда туғилган ўғил болалар ва қизлар ўртасида ўтказилган мазкур вилоят очиқ чемпионатда Қашқадарё, Навоий, Бухоро сингари вилоятлардан 200 нафардан ортиқ ёшлар ўзаро куч синашишди. 

Бухоро вилоят спорт бошқармаси, Ғиждувон туман олимпия ва миллий спорт турлари бўйича ихтисослаштирилган давлат мактаб-интернети ҳамда белбоғли кураш федерацияси Бухоро вилоят бўлими билан ҳамкорликда ўтган очиқ чемпионатда Фирдавс Қиёмиддинов (32 кг. Бухоро), Ғолиб Ибрагимов (71 кг. Навоий), Шахризода Убайдуллаева (+52 кг. Қашқадарё), Кумуш Холмуродова (40 кг. Бухоро) сингари ёшлар ўз вазн тоифаларида биринчи ўринни қўлга киритишди. 

Юқори савияда ташкил этилган мусобақа якунида ғолиб ва совриндорлар диплом, медаль ва эсдалик совғалари билан тақдирланишди. Дарвоқе, шунингдек белбоғли кураш федерацияси Бухоро вилояти бўлими томонидан 2025 йил сарҳисобига бағишланган тадбир ҳам ташкил этилди. Ушбу сарҳисоб тадбирида вилоят федерацияси томонидан ўтган йилги амалга оширилган ишлар таҳлил қилинди. Тадбир сўнггида "энг яхши" деб топилган спортчи ва мураббийлар муносиб тақдирланишди. 

— Миллий спорт туримиз бўлган белбоғли курашни вилоятимизда  янада ривожлантириш бош мақсадимиз саналади,  — дейди Белбоғли кураш федерацияси Бухоро вилояти бўлими ижрочи директори Соҳибжон Қосимов. — Бугун ўтказилган мазкур очиқ чемпионат ҳам нафақат белбоғли курашни оммалашишига хизмат қилади, балки кучли ва иқтидорли спортчини саралаш вазифасини ҳам ўтаб берди. Боиси, жорий йилда белбоғли кураш бўйича нуфузли халқаро мусобақалар ўтказилиши режалаштирилган ва ушбу мусобақаларда вилоятимиз полвонлари ҳам мамлакат миллий терма жамоаларимиз сафида туриб, Юртимиз шарафини ҳимоя қилишни ният қилганмиз.

Илҳом РАҲМОНОВ тайёрлади