Global Chess League. 1 000 000 АҚШ доллари учун кечаётган турнирда Синдаровнинг натижаси қандай бўляпти?

Учинчи мавсум Global Chess League мусобақасида дунёнинг энг кучли гроссмейстерлари иштирок этяпти. Турнирнинг умумий мукофот жамғармаси роппа-роса 1 миллион АҚШ долларини ташкил қилади. Ҳар бир жамоада 6 нафар шахматчи (камида 2 аёл; камида 1 ёш (U-21) ўйинчи бўлиши шарт) дона сурмоқда. 

Жамоалар бир-бири билан айланма тизимда икки мартадан ўйнаши ҳақида хабар берган эдик. Умумий турларлардан сўнг энг кўп очко тўплаган икки жамоа финалда чемпионлик учун курашади. Синдаров шахмат афсонаси Вишванатан Ананд, шунингдек, Винсент Кеймер, Ставрула Цолакиду, Полина Шувалова ва Раунак Садҳвани билан биргаликда Ganges Grandmasters жамоаси шарафини ҳимоя қиляпти. 

Жавоҳир Синдаров 9 та турдан сўнг жамоаси сафида 6 ғалаба, 1 дуранг ва 2 мағлубият қайд этган. Бу унинг жамоасидаги энг яхши натижа. Лекин Ganges Grandmasters жамоасининг 1-тахтадаги афсонаси Вишванатан Ананд ҳақида бундай дея олмаймиз. Собиқ жаҳон чемпиони 9 раунддан 4 та мағлубият, 1 ғалаба ва 4 дуранг натижага эга. 

Бугунги рақиб — Фабиано Каруана бошчилигидаги Fyers American Gambits жамоаси бўлади. Ҳал қилувчи баҳс бизнинг вақт билан соат 16:30да бошланади. Ganges Grandmasters жамоаси бугунги тур олдидан 4-ўринни эгаллаб турибди. Сўнгги турдан кейин 1 ва 2-ўрин соҳиблари чемпионлик, 3 ва 4-ўрин эгалари бронза медаллари учун ўзаро дона суради.