Grand Chess Tour: Синдаровда кетма-кет иккинчи ғалаба, бугун чемпионлик Со билан баҳсда ҳал бўлади

Дунёнинг кўзга кўринган гроссмейстерлари иштирок этаётган турнир классик шахмат йўналишида 9 турдан иборат айланма тизимида ўтказиляпти. Жавоҳир Синдаров кетма-кет иккинчи ғалабасини тантана қилди. Ўтган турда қора доналарда ўйнаганига қарамай, пешқадамлардан бири германиялик Винсент Кеймерни мағлубиятга учрата олган ҳамюртимиз 8-турда нидерландиялик Йорден ван Форестни ҳам таслим этди. 

Ҳиндистонлик Рамешбабу Праггнанандҳа қора доналарда франциялик Максим Вашье-Лагравдан устун келди. Турнинг учинчи ғалабасига Винсент Кеймер эришди. Ўтган турда Жавоҳирга ютқазган германиялик гроссмейстер оқ доналарда ўйнаб, америкалик Фабиано Каруанани енгишга муваффақ бўлди. Қолган икки партия дуранг натижа билан якунланди.  

Бугун ўтказиладиган сўнгги тўққизинчи тур олдидан турнир жадвалида ҳамон америкалик Уэсли Со 5 очко билан пешқадамлик қилмоқда. Рамешбабу Праггнанандҳа ҳам кечаги ғалабаси эвазига очколарини 5 тага етказиб олди. У қўшимча кўрсаткичларга кўра иккинчи ўринни банд этган. Жавоҳир 4,5 очко билан учинчи ўринга кўтарилиб олди. Винсент Кеймер ҳисобида ҳам 4,5 очко бор. Фабиано Каруана, Левон Аронян, Максим Вашье-Лаграв ва Сэм Севьян 4 очко билан кейинги ўринларни банд этган. Аниш Гири 3,5 очко билан 9-ўриндан жой олган бўлса, 1,5 очкога эга Йорден ван Форест сўнгги 10-ўринда бормоқда.   

Бугун 9-турда Жавоҳир Синдаров қора доналарда пешқадам ва шу билан бирга мусобақанинг амалдаги чемпиони Уэсли Со билан ҳисоб-китоб қилади. Эҳтимоий ғалаба ҳамюртимизни чемпионга айлантириши мумкин. Лекин бу ҳолатда қолган ўйинларнинг натижаси ҳам муҳим ҳисобланади. Рамешбабуда ҳам чемпионлик учун имконият сақланиб турибди. Очколар тенг бўлиб қолган ҳолатда, чемпионни аниқлаш учун қўшимча тай-брек ўйналади. Бугунги учрашувлар ҳам бизнинг вақт билан соат 22:00да бошланади. 

Тўлиқ иштирокчилар таркиби: Жавоҳир Синдаров (Ўзбекистон), Фабиано Каруана (АҚШ), Прагнанандҳаа Рамешбабу (Ҳиндистон), Уэсли Со (АҚШ), Левон Аронян (АҚШ), Аниш Гири (Нидерландия), Винсент Кеймер (Германия), Максим Вашье-Лаграв (Франция), Йорден ван Форест (Нидерландия), Сэм Севьян (АҚШ).