Grand Swiss. Ўзбек классикасида қандай натижа қайд этилди? Воҳидовда ғалаба

Турнирнинг умумий мукофот жамғармаси 600 000 (460 000 эркаклар, 140 000 аёллар учун) АҚШ долларини ташкил этиб, унда дунёнинг 164 (114 эркак, 50 аёл шахматчилари) нафар гроссмейстери ғолиблик йўлида дона суряпти. Улар қаторида ёш гроссмейстерларимиз Нодирбек Абдусатторов, Жавоҳир Синдаров, Нодирбек Якуббоев ва Шамсиддин Воҳидовлар ҳам ўз имкониятларини синаб кўришмоқда.

Мусобақа швейцарча тизимда ўтказилаётган бўлиб, кеча гроссмейстерлар 10-турда ўзаро муносабатларига ойдинлик киритиб олишди. Биз учун аҳамиятлиси, бу турда Жавоҳир Синдаров (2658) ва Нодирбек Абдусатторов (2716) ўзаро тўқнаш келишди. Ўзбек классикасида дуранг натижа қайд этилди. Шамсиддин Воҳидов (2578) оқ доналарда Александр Донченко (Германия, 2676) устидан ғалабага эришди. Нодирбек Якуббоев (2616) эса рейтингда ўзидан юқорида бораётган франциялик номдор рақиби Этьен Бакро (2669) билан муросага келди.  

Уч нафар шахматчи Андрей Есипенко (Россия, 2683), Ҳикару Накамура (АҚШ, 2780) ва Видит Гужрати (Ҳиндистон, 2716) 10 имкониятдан 7,5 тадан очко жамғариб, турнир жадвалида қўшҳокимлик қилишяпти. Жавоҳир Синдаров 6 очко билан қўшимча кўрсаткичлар эвазига 12-ўринга кўтарилиб олди. Кечаги дурангдан сўнг очколарини 6 тага етказиб олган Нодирбек Якуббоев 14-поғонага юқорилади. Нодирбек Абдусатторов 6 очко билан 23-ўринга кўтарилди. Кечаги ғалаба эвазига 4,5 очкога эга бўлиб олган Шамсиддин Воҳидов эса 114 иштирокчи орасида 92-поғонадан 76-ўринга жойлашди. 

Бугун шахматчилар ҳал қилувчи 11-тур учрашувларида юзма-юз келишади. Мусобақа пешқадами Андрей Есипенко нидерландиялик Аниш Гири билан, Ҳикару Накамура ҳиндистонлик Аржун Эргаиси билан тўқнаш келади. Нодирбек Абдусатторов қора доналарда украиналик Юрий Кузубов, Жавоҳир Синдаров оқ доналарда россиялик Владислав Артемьев, Нодирбек Якуббоев қора доналарда франциялик Алиризо Фирузжа билан муносабатларига ойдинлик киритиб олади. Шамсиддин Воҳидов эса қора доналарда швециялик Нилс Гранделиусга қарши баҳс олиб боради. 

Бугун ўтказиладиган 11-тур жуфтликлари:

Юрий Кузубов (Украина, 2625) - Нодирбек Абдусатторов (2716) 

Жавоҳир Синдаров (2658) - Владислав Артемьев (Россия, 2697) 

Нодирбек Якуббоев (2616) - Алиреза Фирузжа (Франция, 2777)  

Нилс Гранделиус (Швеция, 2689) - Шамсиддин Воҳидов (2578)