Grenke Chess Festival 2026. Абдусатторов пешқадамлар сафида. Ўзбек дербисида ким ютди?

Мусобақанинг кучлилар жам бўлган Freestyle Open гуруҳида 5-тур учрашувлари ортда қолди. Ушбу гуруҳда қатнашаётган гроссмейстерларимиз Нодирбек Абдусатторов, Нодирбек Якуббоев ва Шамсиддин Воҳидов кечаги кунгача юз фоизлик натижа билан пешқадамлар сафида бораётганди. 

Кеча иккита тур учрашувлари ўтказилди. Тўртинчи турда Шамсиддин Воҳидов оқ доналарда Нодирбек Абдусатторов билан муросага келди. Нодирбек Якуббоев эса оқ доналарда ҳиндистонлик аёл гроссмейстер Ҳарика Дронаваллини мағлубиятга учратди. Афруза Ҳамдамова эса қора доналарга ўйнаганига қарамай, германиялик Тобиас Беккердан устун келди. 

Бешинчи турда Шамсиддин Воҳидов биринчи доскада норвегиялик жаҳон чемпиони Магнус Карлсенга қарши қора доналарда ўйнаб, имкониятни бой бериб қўйди. Нодирбек Якуббоев ҳам бу турда мағлубият аламини тотиб кўрди. У қора доналарда германиялик таниқли гроссмейстер Винсент Кеймерга ютқазди. Нодирбек Абдусатторов эса нидерландиялик Бенжамин Бокдан устун келди.   

Бешинчи турдан сўнг Нодирбек Абдусатторов 4,5 очко жамғарган ҳолда қўшимча кўрсаткичларга кўра 6-ўринни эгаллаб турибди. Винсент Кеймер ва Ҳанс Мок Ниеманн 5 очкодан тўплаб, юз фоизлик кўрсаткич билан турнир жадвалида қўшҳокимлик қилишяпти. Жами 9 нафар шахматчи ҳисобида 4,5 очкодан бор. Нодирбек Якуббоев 4 очколилар орасида энг яхши кўрсаткичга эга ва у умумий жадвалда Топ-10`таликка якун ясаган. Шамсиддин Воҳидов 3,5 очко билан 31-ўриндан жой олган бўлса, 3 очкога эга Афруза Ҳамдамова 81-поғонада бормоқда.

Айни дақиқаларда 6-тур учрашувлари бўлиб ўтмоқда. Нодирбек Абдусатторов қора доналарда германиялик Даниэль Хасрат, Нодирбек Якуббоев оқ доналарда украиналик Олександр Бортник, Шамсиддин Воҳидов оқ доналарда германиялик Алжоша Фюрстак, Афруза Ҳамдамова эса оқ доналарда германиялик Деннис Вагнерга қарши ўйнамоқда.