Гвардиола Ҳусанов ҳақида: "Бошланғич таркибдаги жой ҳеч кимга кафолатланмаган"

Гвардиоланинг айтишича, бу алмаштириш футболчига берилган сариқ карточка ҳамда мураббийлар штабининг чап қанот ҳимоясини мустаҳкамлаш истагидан келиб чиққан.

"Ҳусанов сариқ карточка олганидан сўнг таваккал қилишни хоҳламадик. Ўша пайтда биз чап қанотни кучайтиришимиз керак эди. Нико кутилганидан кўпроқ дақиқа ўйнади, Йошко эса ҳимоя марказида ўйнай бошлади. Бизда жароҳатланганлар бор эди ва ихтиёримизда фақат ёш Витор билан Ҳусанов қолганди", – деди Гвардиола.

Гвардиола, шунингдек, таркибдаги ўрин учун кураш доимий эканлиги ва ҳеч ким бунга олдиндан ишонч ҳосил қила олмаслигини таъкидлади:

"Бу ҳолат шуни кўрсатадики, бошланғич таркибдаги ўрнингни кафолатланган деб ҳисоблаш мумкин эмас. Эртанги ўйин ҳам бунга кафолат бўла олмайди".

Абдуқодир Ҳусанов шу йилнинг январь ойида Франциянинг "Ланс" жамоасидан "Манчестер Сити"га ўтганди. Трансфер қиймати тахминан 40 млн еврони ташкил этди. Ўшандан бери 20 ёшли ўзбекистонлик ҳимоячи Англия Премьер-лигасида 6 та ўйинда майдон тушди.