Ҳар иккала терма жамоамиз ҳам жаҳон чемпионатининг финалида!

Ўз тарихида 42-маротаба ташкил этилаётган дунё биринчилигида айни дақиқаларда жамоавий баҳслар ўтказилмоқда. Ўн етти давлат терма жамоалари баҳсларга киришган эркаклар ўртасидаги мусобақада Ўзбекистон дзюдочилари финалга йўл олишди. 

Дзюдочиларимиз аввалига Туркманистон, кейин эса Иордания терма жамоасини бир хил 3:0 ҳисобида таслим этишганди. Бироз аввал муросасиз кечган 1/2 финалда Италия терма жамоаси 3:2 ҳисобида мағлуб этилди. Терма жамоамизга ҳал қилувчи бешинчи учрашувдаги ғалабани Шоҳруҳ Бахтиёров тақдим этди. 

Аёллар ўртасидаги баҳсларда муваффақиятли қатнашаётган Ўзбекистон аёллар терма жамоаси ҳам финал йўлланмасини қўлга киритди. Қизларимиз аввалига Испания терма жамоасини 3:0, мураккаб кечган 1/2 финалда эса Россияни 3:1 ҳисобида енгишди.