Ҳарбийлар ўртасидаги Жаҳон чемпионатига тайёргарлик муҳокама қилинди

Халқаро спорт кенгашининиг (CISM) дзюдо бўйича спорт комиссияси президенти генерал Фаршад Нажафипур ҳамда унинг ёрдамчиси Ҳамид Ризо Муҳаммад ҳарбийлар ўртасида бўлиб ўтадиган ХХХХII Жаҳон чемпионатига тайёргарлик жараёнини кузатиш учун мамлакатимизга ташриф буюрди. 

Меҳмонлар Ўзбекистон дзюдо федерациясида ташкил этилган брифингда қатнашишди. Учрашув чоғида Мудофаа вазири ўринбосари полковник Алишер Норбоев, Ўзбекистон дзюдо федерацияси бош котиби Азиз Собиров, раис ўринбосари Зафар Қаҳрамонов мамлакатимизда жаҳон чемпионатига олиб борилаётган тайёргарлик ишлари бўйича атрофлича маълумот беришди. 

Ўз навбатида эронлик меҳмонлар Ўзбекистонда дзюдога давлат миқёсида қаратилаётган эътибор туфайли ўзбек спортчилари дунё ареналарида оламшумул ютуқларни қўлга киритаётганини таъкидлаган ҳолда бу заминда ўтказиладиган ҳар қандай халқаро мусобақа юксак даражада ташкиллаштирилишига ишонч билдиришди.

Шундан сўнг меҳмонлар Жаҳон чемпионати иштирокчилари яшайдиган меҳмонхона, машғулот аренаси ҳамда дзюдо федерациясининг фаолияти билан яқиндан танишдилар. Генерал Фаршад Нажафипур татамида дзюдо сир-асрорларини ўрганаётган ёшлар ҳаракатларини кузатди. 

Келажакда улар орасидан Давлат Бобонов, Алишер Юсупов, Диёра Келдиёрова, Гулноза Матниёзова каби номдор спортчилар етшиб чиқишига тилак билдириб, эсдалик учун суратга тушди.