"Ҳумо" Мунтазам чемпионат доирасида "Номад"ни сочиб ташлади

Тошкентнинг "Ҳумо" клуби ўз майдонида Қозоғистоннинг "Номад" жамоасини қабул қилиб, йирик 6:1 ҳисобида зафар қучди. Вадим Кравченко, Жавоҳир Расулов, Егор Буяльский, Александр Дербенёв, Артём Мальцев ва Денис Лудцев киритилган голларга муаллифлик қилишди. Меҳмонлар сафидаги ягона шайба Кирилл Никитин ҳисобига ёзилди.  

Кечаги ғалаба эвазига "Ҳумо" 56 очко билан турнир жадвалида иккинчи ўринни мустаҳкамлаб олди. "Номад" эса 35 очко билан 8-поғонада қолди. Иккала жамоа муддатидан аввал плей-офф йўлланмасини қўлга киритган. 

Жамоалар шу кунгача 17 маротаба тўқнаш келишган, уларнинг 10 тасида "Ҳумо", қолганида эса "Номад" вакиллари зафар қучишган. Бугун жамоалар ўртасидаги иккинчи учрашув ўтказилади. Чемпионатнинг сўнгги ўйини соат 17:00да "Ҳумо Арена"да бошланади.