Ҳумоюн Султонов Германия турнири вице-чемпиони + ФОТО

Мукофот жамғармаси 25 000 долларни ташкил этувчи "M25 Kassel" турнирида ҳамюртимиз Ҳумоюн Султонов ҳам нисбатан муваффақиятли иштирок этди. Ўзбекистоннинг биринчи ракеткаси бу сафар ҳам ҳал қилувчи финалга қадар мағлубиятсиз етиб бориб, якунда вице-чемпионга айанди. 

ATP рейтингида 309-ўринни эгаллаб турган ҳамюртимиз турнирда учинчи рақам остида таснифланган эди. Унинг финалдаги рақиби бельгиялик Рафаэль Коллинон эса тўртинчи ракетка бўлиб, дунё рейтиннгида 342-поғонадан жой олганди. 

Афсуски, Султонов рақибидан рейтингда юқорироқ турган бўлса-да, бу устунликни ҳисобда акс эттира олмади. Коллинон 6/1, 6/4 ҳисобида ғалаба қозониб, мусобақа бош совринини қўлга киритди. Ҳумоюн якунига етган ҳафта ҳам вице-чемпион бўлди. У бундан аввалги ҳафта Бельгиядаги турнирда ҳам финалда ютқазиб қўйганди.