21 фев 20:00
Янгиликлар

Теннис

Ҳумоюн Султонов турнирнинг бешинчи ракеткасини ҳам мағлуб этди

Мамлакатимизнинг биринчи ракеткаси ATP 100 тоифасига кирувчи турнирнинг 1/2 финал иштирокчисига айланди.

Ҳиндистоннинг Пуна шаҳрида ўтказилаётган ушбу "Челленжер" туркумига кирувчи мусобақанинг мукофот жамғармаси 160 000 АҚШ долларини ташкил қилади. Ҳамюртимиз 1/4 финал учрашувида франциялик Уго Бланшени ортиқча қийинчиликсиз мағлубиятга учратди - 6/0, 6/2.

Ҳумоюн 61 дақиқа давом этган баҳсда 3, рақиби эса 2 та эйс зарбасини амалга оширган. Қўшхатолар фаранг теннисчисида кўпроқ бўлди - 5 га 2. Бланше турнирда бешинчи рақам остида таснифланган эди.

Таққослаш учун, теннисчимиз айни пайтда ATP рейтингининг 229-поғонасидан жой олган. Уго эса 164-ўринни эгаллаб турибди. Эртага Султонов финал чиптаси учун чехиялик Далибор Сврчинага қарши кортга чиқади. У бугун россиялик Илья Симякиндан 6/1, 6/3 ҳисобида устун келди.