Ҳусанхон Баратов рақибини нокаут қилган турнирнинг марказий жанги ҳам муддатидан аввал якунланди

Ural FC 2 оқшомининг марказий жангида россиялик таниқли оғир вазн тоифаси вакили Вячеслав Дацик лигада муваффақиятли дебют қилди. У кикбоксинг бўйича ўтган жангда "Мондрагон" лақаби билан танилган бразилиялик Жеронимо Дос Сантосни муддатидан аввал мағлубиятга учратди. 

Дацик биринчи раунднинг 13 ва 40-сонияларида рақибини нокдаун ҳолатига тушириб қўйди. "Мондрагон" реферига йиқила туриб қўлини жароҳатлаб олганини маълум қилди ва натижада жанг тўхтатилди. 

"Сариқ Тарзан" ғалабаси эълон қилинганидан кейин ўзининг навбатдаги рақиби сифатида ватандоши Иван Штирков ёки франциялик Жером Ле Баннерни кўришини айтди. Дацик 2019 йилда Баннерга нокаут билан мағлуб бўлган эди. 

Эслатиб ўтамиз, Ural FC 2 турнири доирасида ҳамюртимиз Ҳусанхон Баратов доғистонлик Шамил Аббасовни иккинчи раундда нокаутга учратиб, ушбу лига камарини қўлга киритган эди.