Игорь Сергеев: "Уругвайни “иккинчи таркиб" деб ажратиш нотўғри”

"Узоқ вақт учиб келдик. Масофа катта ва парвоз осон ўтмади. Энг муҳими етиб келдик ва жойлашиб олдик. Биринчи машғулотни ҳам ўтказиб олдик. Энди Уругвайга қарши ўйинга тайёргарлик кўришни бошлаймиз.

Уругвайнинг асосий таркиби ёки “иккинчи” таркиб деб ажратиш нотўғри назаримда. Уругвай ёшлари ҳам жуда юқори даражадаги футболчилар. Биринчи навбатда ўзимиз яхши тайёрланишимиз керак. Видео таҳлилларни кўриб чиқишимиз ва ўйинга тўғри ёндашиш. Уругвайнинг ўйинини тўлиқ томоша қилмадим. Гол урилган вазиятларни ва ҳужумларини кўриб чиқдим. Умумий хулосага эгамиз ва албатта эртага янада чуқурроқ ўрганамиз. Иккинчи таркибда иштиёқ ва мотивация кўпроқ бўлиши ҳам мумкин. Сабаби ёшлар асосий таркибдан жой олишга ва мураббийларга ўзини кўрсатишга ҳаракат қилади.

Ҳаво бироз иссиқ, намлик юқори. Мен Таиланд чемпионатида ўйнаганман ва ушбу минтақа иқлими менга таниш. Айни дамдаги об-ҳаво яхши ҳисобланади. Бундан-да иссиқроқ об-ҳаво ҳам бўлади. Менга ўрганиб бўлганман, қолган йигитларга об-ҳаво қандай таъсир қилади, билмадим", — деди ҳужумчи.