III Ёшлар Осиё ўйинлари. Ўзбекистон ўз ўрнида, медалларимиз 58 тага етди, қўшниларимиз бизга яқинлашиб олишди (+тўлиқ жадвал)

Айни дақиқаларга қадар Ўзбекистон терма жамоаси спорт делегацияси медаллар жамғариш бўйича жами 58 та медаль қўлга киритиб улгурди. Ёшларимиз 25 та олтин, 10 та кумуш, 23 та бронза медалига эга чиқишди. Бугуннинг ҳисобидан илк медалимиз ҳам олтин бўлди. Ҳозиргина оғир атлетикачимиз Дилнура Холдорова (-77 кг) даст кўтаришда 95 кг натижа билан чемпион бўлди. Медаллар жамғариш бўйича терма жамоамиз ҳамон 2-ўринни мустаҳкам эгаллаб турибди. 

Учинчи ўринга Қозоғистон терма жамоаси кўтарилиб олгани эътиборга молик ҳолат. Қўшниларимиз кеча 6 та олтин медаль қўлга киритганликлари ортидан 3-ўринга юқорилашди. Улар ҳисобида 18 та олтин, 21 та кумуш, 31 та бронза, жами 70 та медаль бор. Шу кунгача 3-ўрин Таиланд терма жамоасига тегишли эди. Таиландликлар 5-ўринга тушиб кетишди. Эрон Ислом Республикаси 17 та олтин, 11 та кумуш, 26 та бронза медали билан 4-ўринга кўтарилди.   

Осиё спорти гегемони Хитой терма жамоасининг умумий медаллари 122 тага етиб улгурди. Чин юрти вакиллари 54 та олтин, 42 та кумуш, 26 та бронза медалига сазовор бўлишган. Ён қўшниларимиздан Тожикистон (2 та олтин, 2 та кумуш, 12 та бронза) билан 18, Туркманистон (1 та олтин, 2 та бронза) 25, Қирғиз Республикаси (7 та кумуш, 11 та бронза) 28, Афғонистон (2 та кумуш, 3 та бронза) билан 30-ўринни банд этган.