IKA ва ISSA ҳамкорлик шартномасини имзолади

Жумладан, бугун Халқаро Кураш ассоциацияси ва Ислом Бирдамлик спорт ассоциацияси раҳбарлари ўртасида учрашув бўлиб ўтди. 

Унда IKA президенти Ҳайдар Фармон, IKA вице-президенти Зиёвиддин Хожиниязов, IKA Администрацияси раҳбари Мансур Мирзаев, ISSA Бош котиби Нассер Айман Мажали, Қозоғистон кураш федерацияси вице-президенти Андрей Боргенс ҳамда Ислом Бирдамлик спорт ассоциацияси ходимлари иштирок этишди.

Учрашув давомида Халқаро Кураш ассоциацияси президенти Ҳайдар Фармон кураш спортининг ривожланиши, барча қитъавий чемпионатлар, ҳакамлар ва мураббийларни тайёрлаш борасида амалга оширилаётган ишлар хусусида батафсил маълумот берди.

Ислом Бирдамлик спорт ассоциацияси бош котиби Нассер Айман кураш спорти ҳақида ўзининг ижобий таъсуротларга эга эканлигини, унинг қоидалари исломий қадриятларга мослигини эътироф этди. Ҳалол баҳоси курашда ҳам, ислом динида ҳам энг олий баҳо эканлигини қайд этди.

IKA вице-президенти Зиёвиддин Хожиниязов Ислом Бирдамлик спорт ассоциацияси билан кўпдан бери ҳамкорликда иш олиб борилаётганлигини, келгусида ҳамкорлик алоқалари кенг қамров касб этиши қайд этиб ўтди. Бу борада қўллаб-қувватлаётганлиги учун ташкилот раҳбарларига ўз миннатдорлигини билдирди.

Йиғилиш давомида икки ташкилот ўртасида келгусида амалга оширилиши лозим бўлган кўплаб дастурлар бўйича ишлар бўйича ҳамкорлик шартномаси имзоланди.

Маълумот учун, Ислом Бирдамлик спорт ассоциацияси Ислом Бирдамлик ўйинларини бошқарувчи олий орган ҳисобланади. Унинг вазифаси ислом мамлакатлари ўртасидаги ҳамкорликни спорт орқали оширишдан иборатдир.