Икки чемпион Холли Холм ва Стефани Хан тарозига чиқди

Оқшом иштирокчилари расмий тарозидан ўтиш маросимида ҳозир бўлишди. Аёллар ўртасида WBA чемпиони Стефани Хан собиқ UFC чемпиони, бокс бўйича бир неча чемпионлик камарлари соҳиби Холли Холмга қарши рингга кўтарилади. 

Иккала боксчи ҳам биринчи уринишдаёқ енгил вазн тоифаси (61,2 кг) лимитини бажаришди. Ҳар икки чемпион тарозида бир хил кўрсаткич қайд этди - 61,1 кг.

Эслатиб ўтамиз, 44 ёшли Холли Холм (34-2, 9КО) аралаш яккакурашларда 12 йиллик фаолиятидан сўнг 2025 йилнинг ёзида бокс рингига қайтганди. Танаффусдан кейинги биринчи жангида у шу пайтгача мағлубиятга учрамаган Йоланда Вегани ҳакамларнинг якдил қарори билан мағлуб этди.

35 ёшли Хан (11-0, 3КО) ҳам рақиби каби кикбоксингда фаолиятини бошлаган ва 30 ёшдан кейин боксга ўтган. У ўтган йилнинг бошида WBA чемпионлик камарини қўлга киритган ва уни бир марта ҳимоя қилишга ҳам муваффақ бўлган.