Икки эркин курашчимиз Осиё чемпионатининг финалида!

Айни дақиқаларда қитъа чемпионатининг иккинчи кунги саралаш беллашувлари ўтказилпяти. Бугун 5 нафар эркин курашчимиз медаллар йўлида баҳсларга киришганди. Улардан 2 нафари финалга йўл олди. 

-86 кг вазн тоифасидаги терма жамоамиз аъзоси, Париж-2024 Олимпиадаси лицензианти  Шавраил Шапиев 1/4 финалда япониялик Татсуя Шираи, 1/2 финалда эса мезбонлар вакили Атаи Изабековни мағлубиятга учратди. Шапиевнинг олтин медаль учун кечадиган беллашувдаги рақиби қозоғистонлик Азамат Даулетбеков бўлади. 

-92 кг вазнда юртимиз шарафини ҳимоя қилаётган Шерзод Поёнов 1/4 финалда мўғулистонлик Батзул Дамжин, 1/2 финалда Қирғиз Республикаси курашчиси Нуртилек Карипбаевни таслим этди. Поёнов финал учрашувида эронлик Амирҳуссейн Фирузпурбандпейга қарши гиламга чиқади. 

Қолган уч курашчимиз саралаш баҳсларида рақибларига имкониятни бой бериб, Осиё чемпионатидаги иштирокларини эрта якунлашди. -61 кг вазндаги Сардор Рўзимов 1/8 финалда ҳиндистонлик Акаш Даҳияга, -74 кг вазн тоифасидаги Зафарбек Отахонов 1/8 финалда эронлик Ҳуссейн Абоузарипашаколайига, 125 кг вазнда курашган Сардорбек Холматов эса 1/4 финалда мўғулистонлик Одгерел Батхишигга ютқазиб қўйди. 

Маълумот учун, финал беллашувлари бизнинг вақт билан соат 17:00да бошланади.