Икки теннис маликамиз Уимблдон 1/2 финалида!

Мусобақанинг асосий тўр баҳслари 29 июнь куни бошланиб, 12 июлга қадар давом этади. Биз учун аҳамиятлиси, аёллар ўртасидаги саралаш турнирида мамлакатимизнинг икки теннис маликаси ҳам ўз омадини синаб кўрмоқда. Кеча улар саралашнинг илк босқичида кортга чиқишди. 

Ўзбекистоннинг иккинчи ракеткаси Мария Тимофеева саралашнинг 1/4 финалида америкалик Уитни Осигве билан ҳисоб-китоб қилди. Бир соату 32 дақиқа давом этган учрашувда Мария ортиқча қийинчиликсиз рақибасини таслим этди - 6/1, 6/4. Бу теннисчиларнинг ўзаро ўтказган илк учрашуви бўлди. Иккала теннисчи ҳам эйс зарбасини амалга ошира билмади. Қўшхатолар Уитнида кўпроқ бўлди - 4 га 3. Мария айни пайтда WTA рейтингида 92, Уитни эса 183-ўринни эгаллаб турибди.  

Мамлакатимизнинг учинчи ракеткаси Полина Кудерметованинг 1/4 финалдаги рақибаси франциялик Жессика Понше бўлди. Баҳс ғолиби уч сет натижасига кўра аниқланди. Биринчи сетни деярли қаршиликсиз бой берган Кудерметова камбэк амалга ошира олди - 1/6, 6/2, 6/3. Бир соату 39 дақиқа давом этган учрашувда Полина 4, Жессика 6 та эйс зарбасини амалга оширди. Қўшхатолар бўйича Кудерметова "устунлик" қилди - 10 га 7. Полина Кудерметова айни пайтда дунёнинг 116, Понше эса 190-ракеткаси бўлиб турибди. Теннисчиларнинг ўзаро иккинчи учрашувида ҳам вакиламиз зафар қучди. 

Бугун ҳар икки теннисчимиз саралашнинг финал чиптаси учун баҳс олиб боради. Мария Тимофеева саралашнинг 1/2 финалида WTA рейтингида 144-ўринда бораётган украиналик Вероника Подрезга, Полина Кудерметова эса 320-поғонадан жой олган америкалик Клерве Нгунуега қарши кортга чиқади. Ҳар икки теннисчимиз иштирокидаги учрашув бизнинг вақт билан соат 19:30да бошланади.