Икки япон юлдузи Иноуэ ва Накатани жанги санаси ҳақида хабар берилди

Японияликлар ўртасидаги ушбу жанг 5 май куни пойтахт Токио шаҳридаги 50 мингга яқин томошабинга мўлжалланган машҳур "Токио Доум" стадионида бўлиб ўтади, дея хабар бермоқда бир-биридан мустақил кўплаб манбалар.

Дастлаб жанг санаси WBC президенти Маурисио Сулаймоннинг сўзларига асосланиб 5 май куни Мексиканинг энг йирик байрамларидан бири "Синко де Маё" [Бешинчи май] арафасида бўлиб ўтиши назарда тутилган эди.

Қизиғи шундаки, тўрт вазн тоифасида жаҳон чемпиони ва икки вазнда мутлақ жаҳон чемпиони бўлган, бир неча йилдан буён қайси вазн тоифасида бўлишидан қатъи назар дунёнинг энг яхши боксчилари учлигига киритиб келинаётган 32 ёшли Иноуэ ўтган йилнинг апрель ойида Япония бокс федерациясининг йиллик мукофотларини топширишга келганида Накатанига 2026 йилда жанг ўтказишни таклиф қилганди.

Ўтган йили Иноуэ биринчи ярим енгил вазндаги унвонларини тўрт марта муваффақиятли ҳимоя қилди. 28 ёшли Накатани эса енгил вазн тоифасидаги унвонларни бирлаштирди ва декабрь ойида биринчи ярим енгил вазнда муваффақиятли дебют қилди.

Унинг Себастьян Эрнандесга қарши жанги жуда рақобатбардош бўлди, аммо ҳакамлар ғалабани япониялик боксчига беришди. 27 декабрь куни Ар-Риёдда бўлиб ўтган ушбу бокс оқшомида ҳам ғалаба қозонган Иноуэ ҳамюрти билан жанг қилиш режасини тасдиқлади.

Эслатиб ўтамиз, Иноуэнинг Япониядаги 14 минг мухлисга мўлжалланган аренада бўлиб ўтган Муроджон Аҳмадалиевга қарши кечган жангига чипталар бор-йўғи икки соатда сотилган эди.