Индонезия Парламенти делегацияси билан туризм ва спорт бўйича ҳамкорлик масалалари муҳокама қилинди

Учрашувда Индонезия Парламенти қўмитаси раиси ўринбосарлари, мазкур давлатнинг “MetroTV” телеканали, “Kumparan” ва “Detik.com” ахборот агентликлари бош муҳаррирлари ҳамда Индонезия Республикасининг Ўзбекистондаги элчиси К.Сунарйо иштирок этишди.

Томонлар Ўзбекистон ва Индонезия давлатлари ўртасидаги муносабатлар ривожланиши, иқтисодий, туризм ва маданий соҳаларда олиб борилаётган ҳамкорлик ишлари тўғрисида фикр алмашишди.

Учрашув давомида Ўзбекистон ҳукумати томонидан Индонезия фуқаролари учун жорий қилинган визасиз тизим, зиёрат туризмини ривожлантириш, авиақатновларни диверсификация қилиш ва туризм соҳасига хорижий инвестицияларни жалб қилиш масалаларига алоҳида тўхталиб ўтилди.

Хусусан, Индонезия фуқаролари учун Ҳаж ва Умра зиёрати олдидан “УМРА+Ўзбекистон” дастурини йўлга қўйиш, юртимиз аэропортларидан имтиёзли фойдаланиб, чартер рейслар ташкил этиш имкониятлари ҳақида батафсил маълумот берилди.

Шунингдек, Индонезиянинг биринчи президенти жаноб Сукарнонинг 1956 йилда амалга оширган тарихий ташрифи ва Имом Бухорий мақбарасига зиёрати билан боғлаб янги маршрут яратилганига алоҳида урғу берилди.

Ўз навбатида, Р.Гобель Индонезия делегациясининг илиқ ва юқори даражада кутиб олингани учун миннатдорчилик билдириб, ҳамкорлик истиқболларини юқори босқичга олиб чиқишга тайёрлик учун Ўзбекистон томонига алоҳида миннатдорчилик билдирди.

Р.Гобель делегацияси таркибида “MetroTV”, Detik.com ҳамда “Kumparan” ахборот агентликлари бош муҳаррирларини таклиф этилишига асосий сабаб, Индонезиянинг мазкур етакчи ОАВлари орқали Ўзбекистоннинг туризм салоҳияти, маданий мерос объектлари, зиёратгоҳлари ва савдо-иқтисодий имкониятларини кенг ёритилишини таъминлаш, шу орқали икки томонлама ҳамкорликни юқори босқичга олиб чиқишга эришиш эканлиги билдирилди.

Шунингдек, томонлар индонезиялик дунёнинг энг кучли бадминтон усталаридан бўлган Тофик Хидаят ва бошқа спортчиларни Ўзбекистонга ташрифини ташкил этиш, ёшлар учун маҳорат дарслари ўтказишни келишиб олишди.