Исроил Мадримов қайси промоутерлик компанияси билан шартнома имзолайди?

Ҳаваскор боксда ўз салтоси билан машҳур бўлган Мадримов Америка заминида машғулотларни ўтказмоқда. У ижтимоий тармоқдаги саҳифасида мураббий Тўлқин Қиличев билан бирга АҚШ рингларини ҳам забт этмоқчимиз, дея изоҳ қолдирган. 

Биз бугун Исроил билан боғланиб, ундан яқин кундаги режалари хусусида сўраганимизда, қуйидагича жавоб олдик:

"Мана бир неча ҳафтадирки, АҚШда ўқув-машғулот йиғини ўтказаяпмиз. Параллел равишда бир қатор промоутерлик компаниялари билан музокара ҳам олиб борилмоқда. Улар орасида Россиянинг "Мир Бокса" промоутерлик компанияси билан шартнома имзолашимиз ҳақиқатга яқин бўлиб турибди. Ҳозирча ҳеч нарса аниқ эмас. Тез орада бу ҳақда сайтингиз орқали хабар берамиз. Бир нарса аниқки, Америкада машғулот ўтказиш, бокс билан шуғулланиш учун идеал шароитлар муҳайё қилинган", - деди Мадримов.